Na brege, v’ oštarije,
na boćarije,
smo boći igrali:
zbijali,
kričali,
z rukama mahali
i kuntreštali.
Milka j’ vino nosila
i va žmuji ga točila.
Mi smo svaki čas pili,
pršuta domaćega jili,
a onput sopet,
boći na oči
do noći.
V noći smo kantajuć šli z’oštarije
put Opatije ......
Kvarner se j’ leskal
va svetle kupal,
zač je po nebe
mesec šećal.
Svetal i žut
je pokazal
nan put.
Drago Gervais
Poezija