Ni bilo takove
rožice bele,
kakova bila je
Tonkina Jele.
Složili se svi,
da lepše već ni.
Su naši fantini
za njun ponemeli,
i svi bi ju bili
ženit oteli,
a mala na čude
čigova da bude.
Pa z oči prevraće
kako svetica,
šegava je mala
kako lisica:
pogaču bi teli,
a mrvice deli.
I su se fantini
skonfužijonali
i puno se puti
rad nje zbarufali,
po staroj užance,
pul Guća na tance.
Ma onput prišal je
z Meriki Franić,
tr semo pa tamo
i zel ju je vranić:
se j’ zajubila
i oženila.
Drago Gervais
06.10.2003.
Poezija